ਸਾਥੋਂ ਜੀ ਨਾ ਹੋਵੇ ਹੋਰ !

ਪਿੰਜਣ ਰੂੰ ਪੰਜੇਰੇ ਆਏ ,

ਅਸਾਂ ਧੁਣਖੀ ਜਿੰਦ  ਚੜ੍ਹਾਈ ,

ਕਿਹੜੇ ਰੱਬ ਦਾ ਧਿਆਨ ਕਰਾਂ ਮੈਂ ,

ਧਰਮਾਂ ਕਾਵਾਂ ਰੌਲੀ ਪਾਈ ,

ਸਾਡੀ ਜਿੰਦ ਮਚਾਵੇ ਸ਼ੋਰ ,

ਸਾਥੋਂ ਜੀ ਨਾ ਹੋਵੇ ਹੋਰ !

ਸਾਡਾ ਰੱਬ ਸਭ੍ਹਨਾ ਤੋਂ ਉੱਚਾ ,

ਜੋ ਨਾ ਸਹਿਮਤ ਮਾਰ ਮੁਕਾਇਆ ,

ਚਾਰ ਚੁਫੇਰੇ ਰੌਲਾ ਪਾਇਆ ,

ਦਹਿਸ਼ਤ, ਅੱਗਾਂ , ਕਹਿਰ ਝੁਲਾਇਆ ,

ਜਲਾਦਾਂ ਦਾ ਚੱਲਦਾ ਜ਼ੋਰ,

ਸਾਥੋਂ ਜੀ ਨਾ ਹੋਵੇ ਹੋਰ !

ਕੀ ਉਮਰਾ ਸੀ , ਕਾਹਦਾ ਥੱਕਣਾ  ,

ਇਸ ਚਰਖੇ ਮੈਂ , ਕੀ ਹੁਣ ਕੱਤਣਾ,
ਪੂਣੀਆਂ ਦੀ ਥਾਂਹ ਲੋਗੜ ਧਰ ਗਈ ,

ਇਹਨੂੰ ਸ਼ਰਮ ਰਤਾ ਨਾ ਆਈ ,
ਇਹ ਜ਼ਿੰਦਗੀ ਜ਼ਾਲਮ ਖੋਰ ,

ਇਹ ਜ਼ਿੰਦਗੀ ਬੜੀ ਕਠੋਰ

ਸਾਥੋਂ ਜੀ ਨਾ ਹੋਵੇ ਹੋਰ !

ਭਰਾਈ ਭਰ , ਤਲਾਈਆਂ ਥੱਕੇ ,

ਨਗੰਦਣ  ਲੇਫ , ਰਜਾਈਆਂ ਅੱਕੇ ,

ਪਾਟੀ ਜੁੱਲੀ ਖੇਸ ਨਿਤਾਣਾਂ ..
ਗਲ੍ਹੀ ਗਲ੍ਹੀ ਇਹ ਫੱਕਰ ਗਾਵੇ ,

ਅਸਾਂ ਤਾਂ ਹੁਣ , ਸ਼ਹੁ ਦੇ  ਘਰ ਜਾਣਾਂ ,

ਹੁਣ ਜਿੰਦ ਨਾ ਕੱਤਦੀ ਹੋਰ !

ਜਸਮੇਰ ਸਿੰਘ ਲਾਲ

31/12/2014