ਉਦਾਸ ਅੱਖਰ ,

ਉਦਾਸ ਅੱਖਰ ,
*
ਕਿਸੇ ਦੇ ਲਿਖੇ ਉਦਾਸ ਅੱਖਰ ,
ਦਿਲ ਮੇਰੇ ਤੇ, ਆ ਕੇ ਜਦੋਂ ਬਹਿਣਗੇ ,
ਦੁੱਖਾਂ ਦੀ ਕਹਾਣੀ ਕਹਿਣਗੇ , ਆਪਣੇ
ਦਿਲ ਨਾਲ ਲਾ ਲਵਾਂਗਾ ਉਂਨ੍ਹਾਂ ਨੂੰ ਮੈਂ !

ਥ੍ਹੋੜਾ ਆਪ ਰੋਵਾਂਗਾ ,
ਥ੍ਹੋੜਾ ਹੋਰ ਰੁਆਵਾਂਗਾ ਉਂਨ੍ਹਾਂ ਨੂੰ ਮੈਂ !

ਹਉਕੇ ਜਰ ਲਵਾਂਗਾ ,
ਹੁੰਝੂ ਉਂਨ੍ਹਾਂ ਦੇ ਪੀ ਲਵਾਂਗਾ ,

ਹਿੱਕ ਆਪਣੀ ਦੇ ਨਾਲ ਲਾ ਕੇ ,
ਵਰਜਾ ਲਵਾਂਗਾ ਉਂਨ੍ਹਾਂ ਨੂੰ ਮੈਂ !

ਤਾਜ਼ੇ ਜਖਮਾਂ ਦੇ ਚੀਰੇ ਫੱਟਾਂ ਉੱਤੇ ,
ਹੋਰ ਲੂਣ ਜਦੋਂ ਛਿੜਕੇਗਾ ਕਦੇ ਕੋਈ ,

ਪਿਆਰ ਚ’ ਡੁਬੋਵਾਂਗਾ , ਪਿਆਰ ਨਾਲ ਧੋਵਾਂਗਾ ,
ਪਿਆਰ ਦੀ ਹੀ ਹੋਰ ਮੱਲ੍ਹਮ, ਲਗਾਵਾਂਗਾ ਉਂਨ੍ਹਾਂ ਨੂੰ ਮੈਂ !

ਕਿਸੇ ਦੇ ਲਿਖੇ ਉਦਾਸ ਅੱਖਰ ,
ਦਿਲ ਮੇਰੇ ਤੇ ਆ ਕੇ ਜਦੋਂ ਬਹਿਣਗੇ .......

ਟਹਿਕਦੇ , ਧੜਕਦੇ ,
ਮਹਿਕਦੇ , ਦਿਲਾਂ ਨੂੰ ,
ਪੱਥਰ ਹੋ ਜਾਣ ਦਾ ,
ਸਰਾਪ ਜਦੋਂ ਦੇਵੇਗਾ ਕੋਈ ,

ਇੰਨ੍ਹਾਂ ਟੂਣਿਆਂ ਦੀ ਉਸ ਜ਼ਹਿਰ ਨੂੰ ,
ਲਾ ਕੇ ਡੀਕ ਆਪਣੇ ਬੁੱਲ੍ਹਾਂ ਦੀ ,
ਪੀ ਜਾਵਾਂਗਾ ਮੈਂ ! ਚੂਸ ਜਾਵਾਂਗਾ ਮੈਂ !

ਦਿਲ ਜੇ ਕਦੀ ਸਰਾਪੇ ਵੀ ਜਾਣਗੇ , ਪੱਥਰ ਬਣ ਜਾਣਗੇ ...
ਵੀਰਾਂਨ ਹੋ ਗਏ ਇੰਨ੍ਹਾਂ ਦਿਲਾਂ ਦੀ ਬਹਾਰ, ਬਣ ਜਾਵਾਂਗਾ ਮੈਂ !
ਪੱਥਰ ਹੋ ਗਏ ਇੰਨ੍ਹਾਂ ਦਿਲਾਂ ਦੀ , ਧੜਕਣ ਬਣ ਜਾਵਾਂਗਾ ਮੈਂ !

ਅੱਖਰ ਜੋ ਖਿੱਲਰ ਗਏ,
ਕਿੱਧ੍ਹਰੇ ਗੁਆਚ ਗਏ... ਉੜ ਗਏ ...
ਵਕਤ ਦੀਆਂ ਹਨੇਰੀਆਂ ਵਿੱਚ ,
ਰੇਗਸਤਾਨ ਦੇ ਰੇਤਿਆਂ ਵਿੱਚ... ਕਿਧਰੇ ਕਿਰ ਗਏ ....

ਜੋ ਕਦੀ ਗੀਤ ਬਣ, ਕਿਸੇ ਬੁੱਲ੍ਹਾਂ ਤੇ ਆ ਨਾਂ ਸਕੇ ...

ਮੈਂ ਨਵੇਂ ਗੀਤ ਲਿਖਾਂਗਾ ,
ਇੰਨ੍ਹਾ ਗੀਤਾਂ ਦੀਆਂ ਸੁਰਾਂ ਵਿੱਚ ,
ਗੁਆਚ ਗਏ ਉਂਨ੍ਹਾਂ ਅੱਖਰਾਂ ਦੀਆਂ, ਯਾਦਾਂ ਪ੍ਰੋ ਜਾਵਾਂਗਾ ਮੈਂ !

ਕਿਸੇ ਦੇ ਲਿਖੇ ਉਦਾਸ ਅੱਖਰ ,
ਦਿਲ ਮੇਰੇ ਤੇ ਆ ਕੇ ਜਦੋਂ ਬਹਿਣਗੇ .......

ਤਮਾਂਮ ਉਮਰ ਜੋ ਰਿਹਾ ਕਰਦਾ,
ਉਡੀਕ ਆਪਣੀ , ਜ਼ਿੰਦਗੀ ਨੂੰ ਮਿਲਣ ਦੇ ਲਈ ,

ਉਸਦੀ ਉਦਾਸ ਮੜ੍ਹੀ ਤੇ ਹਰ ਰੋਜ਼ ,
ਦੀਵਾ ਜਗਾਉਣ ,ਜਾਵਾਂਗਾ ਮੈਂ !!

ਉਸਦੀ ਉਦਾਸ ਮੜ੍ਹੀ ਦਾ ,
ਜਗਦਾ ਚਰਾਗ, ਬਣ ਜਾਵਾਂਗਾ ਮੈਂ ! !

ਕਿਸੇ ਦੇ ਲਿਖੇ ਉਦਾਸ ਅੱਖਰ ,
ਦਿਲ ਮੇਰੇ ਤੇ ਆ ਕੇ ਜਦੋਂ ਬਹਿਣਗੇ ,
ਦੁੱਖਾਂ ਦੀ ਕਹਾਣੀ ਕਹਿਣਗੇ , ਆਪਣੇ
ਦਿਲ ਨਾਲ ਲਾ ਲਵਾਂਗਾ ਉਂਨ੍ਹਾਂ ਨੂੰ ਮੈਂ !

ਹਉਕੇ ਜਰ ਲਵਾਂਗਾ , ਹੁੰਝੂ ਉਂਨ੍ਹਾਂ ਦੇ ਪੀ ਲਵਾਂਗਾ ਮੈਂ !

ਜਸਮੇਰ
02/06/2012
05/06/2015