ਅੱਜ , ਪੁੱਛਦੀ ਪਈ ਰਾਤਾਂ ਕੋਲੋਂ ਮੈਂ ,

ਅੱਜ , ਪੁੱਛਦੀ ਪਈ ਰਾਤਾਂ ਕੋਲੋਂ ਮੈਂ ,
ਕਿਹੜੇ ਨ੍ਹੇਰਿਆਂ ਨੇਂ ਚੰਨ ਮੇਰਾ ਡੱਕਿਆ !

ਚੇਤਿਆਂ ਚ’ ਰਹਿਣ ਵਾਲਿਆ ,
ਤੇਰਾ ਨਾਂ , ਮੇਰੇ ਸਾਹਵਾਂ ਵਿੱਚ ਰਚਿਆ !

ਵੇ ਜ਼ਿੰਦਗੀ ਦਿਖਾਉਣ ਵਾਲਿਆ ,
ਕਾਹਨੂੰ ਜ਼ਿੰਦਗੀ ਦੇ ਨਾਲ ਬੈਠੋਂ ਰੁੱਸਿਆ !

ਫੁੱਲਾਂ ਕੋਲ ਰੰਗ ਮੁੱਕ ਗਏ ,
ਰੋਣ ਤਿੱਤਲੀਆਂ , ਹਵਾਵਾਂ ਮੈਨੂੰ ਦੱਸਿਆ !

ਧੁੱਪਾਂ ਵਿੱਚੋਂ ਨਿੱਘ੍ਹ ਸੁੱਕਿਆ ,
ਖੌਰੇ ਸੂਰਜੇ ਨੂੰ ਕਿਹੜੀ ਰੁੱਤ ਡੱਸਿਆ !

ਵਸਲਾਂ ਦੀ ਬਹੀ ਚੁੱਕ ਕੇ ,
ਮੈਂ ਤੇਰੇ ਅੱਖਰਾਂ ਨੂੰ ਛਾਤੀ ਨਾਲ ਘੁੱਟਿਆ !

ਵਾਰ ਵਾਰ ਚੁੰਮਾਂ ਓਸਨੂੰ ,
ਤੂੰ ਜੋ ਨਾਂ ਮੇਰੀ ਤਲੀ ਤੇ’ ਸੀ ਲਿਖਿਆ !

ਗੁੱਠ ਵਿੱਚ ਖੜ੍ਹਾ ਬਿਰਹੜਾ ,
ਮਾਰ ਤਾੜੀ ਨੀ ਓਹ , ਮੇਰੇ ਉੱਤੇ ਹੱਸਿਆ !

ਅੱਜ , ਪੁੱਛਦੀ ਪਈ ਰਾਤਾਂ ਕੋਲੋਂ ਮੈਂ ,
ਕਿਹੜੇ ਨ੍ਹੇਰਿਆਂ ਨੇਂ ਚੰਨ ਮੇਰਾ ਡੱਕਿਆ !

ਵੇ ਚੇਤਿਆਂ ਚ’ ਰਹਿਣ ਵਾਲਿਆ ,
ਤੇਰਾ ਨਾਂ , ਮੇਰੇ ਸਾਹਵਾਂ ਵਿੱਚ ਰਚਿਆ !

*

ਜਸਮੇਰ ਸਿੰਘ ਲਾਲ
02/02/2015