ਇਕ ਖਤ ਕਦੇ ਤੂੰ , ਜੋ ਮੇਰੇ ਦਿਲ ਤੇ ਲਿਖਿਆ ਸੀ ,

ਇਕ ਖਤ ਕਦੇ ਤੂੰ , ਜੋ ਮੇਰੇ ਦਿਲ ਤੇ ਲਿਖਿਆ ਸੀ ,

ਅਜੇ ਵੀ ਸੰਦਲੀ ਹੈ , ਤੇਰੀ ਮਹਿਕ ਦਾ ਭਰਿਆ ਹੈ !!

ਇੱਕ ਕਦਮ ਕਦੇ ਤੂੰ , ਮੇਰੀ ਜੂਹ ਵਿੱਚ ਧਰਿਆ ਸੀ ,

ਉਹ ਅਜੇ ਵੀ ਛਪਿਆ ਹੈ , ਉੱਥੇ ਹੀ ਟਿਕਿਆ ਹੈ  !!

ਓਸ  ਰਾਤ ਦੀ ਟੁਕੜੀ ਜੋ , ਤੂੰ , ਅੰਬਰ ਤੋਂ ਤੋੜੀ ਸੀ ,

ਉੱਥੇ ਤਾਰੇ ਜਗਦੇ ਹਨ , ਤੇਰੀਆਂ ਗੱਲਾਂ ਕਰਦੇ ਹਨ !!

ਇੱਕ ਵਕਤ ਦੀ ਕਾਤਰ ਜੋ , ਤੂੰ ਧਰਤ ਤੇ ਸਾਂਭ੍ਹੀ ਸੀ ,

ਉੱਥੇ ਭੱਖੜੇ ਉੱਗ ਪਏ ਨੇਂ , ਤੇ ਮੇਰੇ ਪੈਰੀਂ ਚੁਭ੍ਹਦੇ ਨੇਂ !!

ਓਸ  ਵਕਤ ਦਾ ਵਰਕਾ , ਜੋ ਤੂੰ ਗਹਿਣੇ ਧਰਿਆ ਸੀ ,

ਅੱਜ ਕਰਜ਼ਾ ਮੰਗਦਾ ਹੈ , ਤੈਥੋਂ ਲੈਹਣਾ ਮੰਗਦਾ ਹੈ !!

ਰੀਝਾਂ ਦੀ ਮਟਕੀ ਜੋ,  ਤੂੰ ਮੇਰੇ ਸਿਰ ਤੇ ਧਰ ਗਿਆ ਸੀ ,

ਅੱਜ ਭੁੰਜੇ ਗਿਰ ਗਈ ਹੈ , ਤੇ ਠੀਕਰੀਂ ਕਿਰ ਗਈ ਹੈ !!

ਇੱਕ ਸੁਪਨਾ ਕਦੇ ਤੂੰ ਜੋ , ਮੇਰੀ ਗੋਦੀ ਪਾਇਆ ਸੀ ,

ਹੁਣ ਵੱਡਾ ਹੋ ਗਿਆ  ਹੈ ,  ਤੇ ਓਹ  ਤੈਨੂੰ ਪੁੱਛਦਾ ਹੈ !!

ਓਹ ਸਾਥ ਕਦੇ ਤੂੰ ਜੋ , ਮੇਰਾ ਹੱਥ ਫੜ ਤੁਰਿਆ ਸੀ ,

ਮੇਰੀ ਆਂਦਰਾਂ ਛੋਲਦਾ , ਤੈਨੂੰ ਅਜੇ ਵੀ ਟੋਲਦਾ ਹੈ  !!

ਇੱਕ ਬਾਤ ਕਦੇ ਤੂੰ , ਜੋ ਮੇਰੇ ਦਿਲ ਨੂੰ ਪਾਈ ਸੀ ,

ਅਜੇ ਵੀ ਲੋਚਦੀ ਹੈ , ਤੈਨੂੰ ਅਜੇ ਵੀ ਸੋਚਦੀ ਹੈ !!

ਓਹ ਰਾਹ ਕਦੇ  ਤੂੰ ਜੋ , ਹਮਰਾਹ ਹੋ ਚੁਣਿਆਂ  ਸੀ ,

ਤੈਨੂੰ ਵਾਜਾਂ ਮਾਰਦਾ ਹੈ , ਤੈਨੂੰ ਪਿਆ ਨਿਹਾਰਦਾ ਹੈ !

ਜਸਮੇਰ ਸਿੰਘ ਲਾਲ

07/11/2014