ਕੋਈ ਜ਼ਰੂਰ ਹਾਸੇ ਖਿਲਾਰਦਾ ਲੰਘਿਆ ਹੋਵੇਗਾ ਮੇਰੀ ਗਲੀ ,
ਹਵਾ ਚ' ਅੱਜ ਤਾਜ਼ਗੀ ਹੈ ਬੜੀ !

ਕੋਈ ਜ਼ਰੂਰ ਲੰਘਿਆ ਹੋਵੇਗਾ ਇਧਰੋਂ ਖੁਸ਼ਬੂ ਬਣਕੇ
ਹਵਾ ਚ' ਅੱਜ ਸਾਦਗੀ ਹੈ ਬੜੀ !!

ਉਸਨੂੰ ਆਖੋ ਕਿ ,
ਇੱਕ ਖਿਆਲ, ਮੇਰੀ ਤਲੀ ਤੇ ਧਰ ਜਾਵੇ ,

ਆਖੋ ਉਸਨੂੰ ਕਿ ,
ਕੁੱਝ ਸੁਰਾਂ , ਮੇਰੀ ਰਬਾਬ ਚ' , ਭਰ ਜਾਵੇ ,

ਉਸਨੂੰ ਆਖੋ ਕਿ ,
ਓਹ ਫਿਰ , ਇਸ ਗਲੀ , ਪਰਤ ਆਵੇ ,

ਮੇਰੇ ਗੀਤਾਂ ਨੂੰ ,
ਫਿਰ ਤੋਂ , ਅੱਜ , ਪਿਆਸ ਲੱਗੀ ਹੈ ਬੜੀ !!

ਉਸਨੂੰ ਆਖੋ ਕਿ ,
ਧਿਆਨ ਨਾਲ ਆਵੇ ਇਸ ਗਲੀ ਅੰਦਰ ,

ਹਨ੍ਹੇਰੇ ਪੈਰ ਪੈਰ ਉੱਤੇ ,
ਲੁਟੇਰੇ ਖੁਸ਼ਬੂਆਂ ਨੂੰ , ਇਸ ਸ਼ਹਿਰ ਚ’ ਲੁੱਟਦੇ ਬੜੇ !

ਆਖੋ ਓਸਨੂੰ ਕਿ ਪੈਰ ,
ਹੌਲੀ ਹੌਲੀ ਧਰੇ ਇੰਨ੍ਹਾਂ ਪੱਥਰਾਂ ਤੇ ,

ਖਾ ਖਾ ਸੱਟਾਂ ,
ਇਸ ਸ਼ਹਿਰ ਚ’ ਦਿਲ ਟੁੱਟਦੇ ਬੜੇ !!

ਉਸਨੂੰ ਆਖੋ ਕਿ ,
ਓਹ ਫਿਰ , ਇਸ ਗਲੀ , ਪਰਤ ਆਵੇ ,

ਉਸਨੂੰ ਆਖੋ ਕਿ ,
ਇੱਕ ਖਿਆਲ, ਮੇਰੀ ਤਲੀ ਤੇ ਧਰ ਜਾਵੇ ,

ਆਖੋ ਉਸਨੂੰ ਕਿ ,
ਕੁੱਝ ਸੁਰਾਂ , ਮੇਰੀ ਰਬਾਬ ਚ' , ਭਰ ਜਾਵੇ ,

ਮੇਰੇ ਗੀਤਾਂ ਨੂੰ ,
ਫਿਰ ਤੋਂ , ਅੱਜ , ਪਿਆਸ ਲੱਗੀ ਹੈ ਬੜੀ !!
*
ਜਸਮੇਰ ਸਿੰਘ ਲਾਲ
28 / 05 / 2014

 —