ਨੀ ਕਲ੍ਹ ਕੋਈ ਆਇਆ ... ਫਿਰ ਮੇਰੇ ਵਿਹੜੇ !!

ਉਸ ਬੰਜਰੀਂ ਫੇਰਾ ਮਾਰਿਆ ,
ਉਸ ਖੰਡਰੀਂ ਦੀਵਾ ਬਾਲਿਆ ,
ਕੋਈ ਅਨਹਦ ਨਾਦ ਵਜਾਇਆ ....ਕਲ੍ਹ ਮੇਰੇ ਵਿਹੜੇ !!

ਮੇਰੇ ਸੁਪਨੀਂ ਦੰਦਲਾਂ ਤੋੜੀਆਂ ,
ਮੇਰੀ ਸੁੰਨ ਦੀ ਉਂਗਲਾਂ ਖੋਲ੍ਹੀਆਂ ,
ਉਸ ਮੂੰਹ ਵਿੱਚ ਅੰਮ੍ਰਿਤ ਪਾਇਆ ..ਕਲ੍ਹ ਮੇਰੇ ਵਿਹੜੇ !!

ਮੇਰੇ ਜ਼ਖਮੀਂ ਲਾਈਆਂ ਮਲ੍ਹਮਾਂ ,
ਮੇਰੀ ਸੱਟਾਂ ਲੋਗੜ ਸੇਕੀਆਂ ,
ਮੇਰੇ ਸਿਦਕ ਨੂੰ ਕੇਸਰ ਲਾਇਆ ...ਕਲ੍ਹ ਮੇਰੇ ਵਿਹੜੇ !!

ਉਸ ਜ਼ਹਿਰਾਂ ਮੰਤਰ ਕੀਲੀਆਂ ,
ਦਿੱਤੀ ਟੂਣੇ ਗੁੱਗਲ ਧੂਣੀਆਂ ,
ਨੀ ਕਿਸੇ ਯੋਗੀ ਫੇਰਾ ਪਾਇਆ ... ਕਲ੍ਹ ਮੇਰੇ ਵਿਹੜੇ !!

*

ਜਸਮੇਰ ਸਿੰਘ ਲਾਲ
26/04/2014