ਅਖੰਡਤ ਤੋਂ ਖੰਡਤ
*
ਗੁਰਬਤ ,
ਸਿਰਫ ਆਰਥਕ ਹੀ ਨਹੀਂ ,
ਸਿਧਾਂਤਕ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਸ਼ਰੀਰਕ ਹੀ ਨਹੀਂ ,
ਮਾਨਸਕ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਦਸ਼ਾ ਦੀ ਹੀ ਨਹੀਂ ,
ਦਿਸ਼ਾ ਦੀ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਸੋਚ ਦੀ ਹੀ ਨਹੀਂ ,
ਸੁਪਨਿਆਂ ਦੀ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਫਲਸਫਿਆਂ ਵਿੱਚ ਹੀ ਨਹੀਂ ,
ਵਿਚਾਰਾਂ ਵਿੱਚ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਵਿਚਾਰਾਂ ਵਿੱਚ ਹੀ ਨਹੀਂ ,
ਕਿਰਦਾਰਾਂ ਵਿੱਚ ਵੀ ਹੁੰਦੀ ਹੈ !
ਗੁਰਬਤ ,
ਸਿਰਫ ਨੀਤੀ ਦੀ ਹੀ ਨਹੀਂ ,
ਨੀਤੀ ਵਿੱਚ ਬਦਨੀਤੀ ਦੀ ਵੀ ਹੁੰਦੀ ਹੈ !
ਗੁਲਾਮੀ ,
ਸਿਰਫ ਵਿਦੇਸ਼ੀ ਅਧੀਨਗੀ ਵਿੱਚ ਹੀ ਨਹੀਂ ,
ਸਵਦੇਸ਼ੀ ਅਤਿਆਚਾਰ ਦੀ ਵੀ ਹੁੰਦੀ ਹੈ !
ਅੰਦੋਲਨ ,
ਸਿਰਫ ਭੁਖਮਰੀ ਦੀ ਕੁੱਖ ਚੋਂ ਨਹੀਂ ਜੰਮਦੇ ,
ਦਹਿਸ਼ਤ , ਕਹਿਰ , ਜ਼ੁਲਮ , ਗੁੰਡਾਗਰਦੀ ‘ਤੇ
ਬੇਇਨਸਾਫੀ ਦੀ ਗੁਲਾਮੀ ਚੋਂ' ਵੀ ਉੱਗਦੇ ਹਨ !
ਅੰਦੋਲਨ ,
ਦੇਸ ਵਿੱਚ ਰਹਿੰਦਿਆਂ ਹੋਇਆਂ ,
ਪ੍ਰਦੇਸੀ ਹੋਣ ਵਿੱਚੋਂ ਵੀ ਪੂੰਗਰਦੇ ਹਨ !
ਬੜਾ ,
ਖਤਰਨਾਕ ਹੁੰਦਾ ਹੈ , ਦੇਸ਼ ਦੀ ਨੀਤੀ ਦਾ ਬਦਨੀਤ ਹੋ ਜਾਣਾ !!
ਬੜਾ ,
ਖਤਰਨਾਕ ਹੁੰਦਾ ਹੈ , ਦਿਸ਼ਾ ਤੋਂ ਦਿਸ਼ਾਹੀਣ ਹੋ ਜਾਣਾ !!
ਬੜਾ ,
ਖਤਰਨਾਕ ਹੁੰਦਾ ਹੈ , ਅਖੰਡਤ ਤੋਂ ਖੰਡਤ ਹੋ ਜਾਣਾ !!
ਬੜਾ ,
ਖਤਰਨਾਕ ਹੁੰਦਾ ਹੈ , ਜੋਤ ਤੋਂ ਜੋਤਹੀਣ ਹੋ ਜਾਣਾ !!
*
ਜਸਮੇਰ ਸਿੰਘ ਲਾਲ
04 / 06 / 2014
No comments:
Post a Comment