ਹਾਏ ਨੀ ਮਿੱਠੀਏ ਕੁੜੀਏ ,
ਦੋ ਡਲੀਆਂ ਮਿਸ਼ਰੀ ਬੋਲਾਂ ਦੀਆਂ , ਅੱਜ ਮੇਰੀ ਤਲੀ ਵੀ ਧਰਦੀ ਜਾ ... !!

ਨੀ ਸੋਨ ਚਿੜੀ ਜਹੀ ਕੁੜੀਏ ,
ਦੋ ਚੁੰਝ੍ਹਾਂ ਮੇਰੇ ਬਨੇਰੇ ਤੇ , ਪਏ ਪ੍ਰੀਤ-ਕਲਸ ਚੋਂ ਭਰਦੀ ਜਾ .... !!

ਨੀ ਕਵਿਤਾ ਵਰਗੀਏ ਕੁੜੀਏ ,
ਦੋ ਬੋਲ ਅਜ਼ਲ ਤੋਂ ਗੀਤਾਂ ਦੇ , ਕਿਸੇ ਗੀਤ ਮੇਰੇ ਵਿੱਚ ਜੜਦੀ ਜਾ .... !!

ਮੇਰੇ ਗੀਤਾਂ ਸੀਨੇ ਅੱਗ ਬਲੇ ,
ਦੋ ਬੂੰਦਾਂ ਸਵਾਤੀ ਇਤਰ ਦੀਆਂ , ਅੱਜ ਇੰਨ੍ਹਾਂ ਦੇ ਬੁਲ੍ਹੀਂ ਧਰਦੀ ਜਾ ....!!

ਨੀ ਪਰੀ ਦੇਸ਼ ਦੀਏ ਕੁੜੀਏ ,
ਕਦੇ ਧਰਤ ਮੇਰੀ ਇਸ ਤਪਦੀ ਤੇ , ਬਣ ਪ੍ਰੀਤ ਦੀ ਬਦਲੀ ਵਰ੍ਹਦੀ ਜਾ ...!!

ਨੀ ਗਜ਼ਲ ਜਹੀ ਤੂੰ ਕੁੜੀਏ ,
ਦਰ ਆਏ ਫਕੀਰ ਦੀ ਝੋਲੀ ਤੂੰ , ਗੀਤਾਂ ਦੀ ਭਿੱਖਿਆ ਧਰਦੀ ਜਾ ... !!

ਇੱਕ ਉਮਰ ਗਈ ਮੇਰੀ ਤੁਰਦੇ ਦੀ ,
ਮੇਰੀ ਨੀਝ ਗਈ , ਰਾਹੀਂ ਖੁਰਦੇ ਦੀ ,

ਨੀ ਜੋਤ ਜਹੀ ਤੂੰ ਕੁੜੀਏ ,
ਇਸ ਔਝ੍ਹ੍ੜ ਭਟਕੇ ਰਾਹੀ ਨੂੰ , ਫੜ ਉਂਗਲ ਮੰਜ਼ਲ ਦੱਸਦੀ ਜਾ ....!!

ਮੇਰੀ ਆਸ ਕਿਤੇ ਨਾ ਮੁੱਕ ਜਾਵੇ ,
ਮੇਰੀ ਤੜਪ ਕਿਤੇ ਨਾ ਟੁੱਟ ਜਾਵੇ ,
ਇਹ ਝੀਲ ਕਿਤੇ ਨਾ ਸੁੱਕ ਜਾਵੇ ,

ਕਿਸੇ ਹੰਸ ਦੇਸ਼ ਦੀਏ ਕੁੜੀਏ ,
ਕਦੇ ਮਾਰ ਉਡਾਰੀ ਮੇਰੇ ਵਲ ., ਮੇਰੀ ਝੀਲ ਦੇ ਪਾਣੀਆਂ ਤਰਦੀ ਜਾ ... !!

ਹਾਏ ਨੀ ਮਿੱਠੀਏ ਕੁੜੀਏ .....
ਦੋ ਡਲੀਆਂ ਮਿਸ਼ਰੀ ਬੋਲਾਂ ਦੀਆਂ , ਅੱਜ ਮੇਰੀ ਤਲੀ ਵੀ ਧਰਦੀ ਜਾ ...!!

**

ਸਾਡੀ ਇੱਕ ਉਭ੍ਹਰ ਰਹੀ ਨੌਜਵਾਨ ਕਲਮ Harpreet Kaur ਹਰਪ੍ਰੀਤ ਕੌਰ ਦੀਆਂ ਸਾਰੀਆਂ ਕਵਿਤਾਵਾਂ ਅਤੇ ਖਾਸ ਤੌਰ ਉੱਤੇ ਉਸਦੀ ਸੱਜਰੀ ਕਵਿਤਾ ,

" ਤੂੰ ਜਦ ਵੀ
ਸ਼ਬਦਾਂ ਨੂੰ ਛੋਹੇਂਗਾ
ਮੈਂ ,ਨਜ਼ਮ ਬਣ ਤੇਰੇ
ਖਿਆਲਾਂ 'ਚ ਆ ਜਾਵਾਂਗੀ...." ਨੂੰ ਸਮਰਪਤ !! ਸ਼ਾਲਾ ਇਹ ਕਲਮ ਹੋਰ ਵੀ ਦਿਨ ਦੂਣੀ ਅਤੇ ਰਾਤ ਚੌਗਣੀ ਤਰੱਕੀ ਕਰਦੀ ਜਾਵੇ !!

**

ਜਸਮੇਰ ਸਿੰਘ ਲਾਲ
27/04/2014

 —