ਆਪੇ ਹੱਸੇ ,
ਅਸੀਂ ਆਪੇ ਰੋਏ !!

ਆਪੇ ਰੁੱਸੇ ,
ਆਪੇ ਸਾਈਆਂ , ਅਸੀਂ ਆਪਣੇ ਨਾਲ ਖਲੋਏ !!

ਠੱਕੇ ਕੱਕਰ,
ਧੁੱਪਾਂ ਝੱਖੜ ,

ਜ਼ਿੰਦਗੀ ਦੀ ,
ਹਰ ਤਿੱਖੀ ਰੁੱਤੇ ,

ਆਪੇ ਟੁੱਟੇ ,
ਆਪੇ ਸਾਈਆਂ , ਅਸੀਂ ਆਪਣੇ ਨਾਲ ਪ੍ਰੋਏ !!

ਆਪੇ
ਅਸੀਂ ਬੀਜੇ ,

ਹੱਥੀਂ
ਆਪਣੇ ਹੀ ਕੱਟੇ ,

ਸਿਰੀਂ
ਆਪਣੇ ਹੀ ਛੱਟੇ ,

ਅਸੀਂ
ਛੱਜ ਵੀ ਸੀ ਆਪੇ ,

ਅਸੀਂ
ਛਾਂਨਣੀ ਵੀ ਹੋਏ ,

ਤੁਰੇ
ਆਪੇ ਵਿੱਚ ਰਾਤਾਂ ,

ਅਸੀਂ
ਚਾਨਣੀ ਵੀ ਹੋਏ ,

ਕੱਤੇ,
ਅਸੀਂ ਆਪੇ ,

ਆਪੇ
ਰੰਗ ਅਸੀਂ ਰੱਤੇ ,

ਗੀਤ
ਆਪੇ ਅਸੀਂ ਲਿਖੇ ,

ਆਪੇ
ਦਿੱਤੀਆਂ ਦੁਆਵਾਂ ,

ਸਾਈਆਂ ...
ਇਹ ਕੇਹੀਆਂ ਰਾਹਵਾਂ ...ਕੋਈ ਦੱਸੇ ਸਰਨਾਵਾਂ !!

ਭਾਵੇਂ ਲੁੱਟੇ
ਭਾਵੇਂ ਖੋਏ .

ਭਾਵੇਂ ਜਿੱਤੇ ,
ਭਾਵੇਂ ਹਾਰੇ ,

ਭਾਵੇਂ
ਚੂਰ ਚੂਰ ਹੋਏ ,

ਤੇਰੀ
ਰਜ਼ਾ ਵਿੱਚ ਸਾਈਆਂ , ਵੇ ਅਸੀਂ ਨੂਰ ਨੂਰ ਹੋਏ ...!!

ਜਸਮੇਰ ਸਿੰਘ ਲਾਲ
30/05/2014

 —