ਤੁਰੇ ਸਾਂ ਇੱਕਠੇ ਕਦੀ , ਜ਼ਿੰਦਗੀ ਦੇ ਰਾਹਾਂ ਉੱਤੇ ,
ਅੱਜ ਉਂਨ੍ਹਾਂ ਰਾਹਾਂ ਚੋਂ ਮੈਂ , ਜ਼ਿੰਦਗੀ ਨੂੰ ਲਭ੍ਹਦੀ ਫਿਰਾਂ ... !!

ਹੱਸੇ ਸਾਂ ਇੱਕਠੇ ਕਦੀ , ਉਦਾਸੀਆਂ ਨੂੰ ਤੋੜ ਕੇ ਵੇ ,
ਅੱਜ ਮੈਂ ਉਦਾਸੀਆਂ ਚੋਂ , ਹਾਸਿਆਂ ਨੂੰ ਲਭ੍ਹਦੀ ਫਿਰਾਂ ... !!

ਕਾਲੀਆਂ ਵੇ ਰਾਤਾਂ ਚੋਂ ’ , ਭੁਲੇਖੇ ਪੈਣ ਚਾਨਣੀ ਦੇ ,
ਮੱਸਿਆ ਦੀ ਰਾਤ ਵਿੱਚੋ , ਚੰਨ ਨੂੰ ਮੈਂ ਲਭ੍ਹਦੀ ਫਿਰਾਂ ....!!

ਯਾਦਾਂ ਕਰ ਚੱਲੀਆਂ , ਵੇ , ਬਾਂਵਰੀ ਸ਼ੁਦੈਣ ਮੈਨੂੰ ,
ਅੱਗ ਦੀ ਮੈਂ ਰਾਖ ਵਿੱਚੋਂ , ਤਾਰਿਆਂ ਨੂੰ ਲਭ੍ਹਦੀ ਫਿਰਾਂ ....!!

ਪੈੜ ਫਿਰਾਂ ਟੋਲਦੀ ਮੈਂ , ਗੁੰਮ ਗਏ ਰਾਹਾਂ ਵਿੱਚੋ ,
ਵਗ ਚੁੱਕੇ ਪਾਣੀਆਂ ਨੂੰ , ਪੁਲਾਂ ਹੇਠੋਂ ਲਭ੍ਹਦੀ ਫਿਰਾਂ .....!!

ਅੱਜ ਖੜ੍ਹੀ ਕੰਢੇ ਉੱਤੇ , ਤੁਰ ਗਈਆਂ ਬੇੜੀਆਂ ਨੂੰ
ਲਹਿਰਾਂ ਦੀ ਮੈਂ ਗਹਿਰ ਵਿੱਚੋਂ , ਪੱਤਣਾਂ ਤੇ ਲਭ੍ਹਦੀ ਫਿਰਾਂ ...!!

ਜਸਮੇਰ ਸਿੰਘ ਲਾਲ
11/05/2014