ਆਓ
ਕੋਈ ਤਾਰਿਆਂ ਦੀ ਗੱਲ ਕਰੀਏ ,

ਛੰਨਾ
ਢਾਰਿਆਂ ਦੀ ਗੱਲ ਕਰੀਏ !!

ਨਿੱਤਰੇ ਅਸਮਾਨ ਵਿੱਚ ,
ਤੁਰੇ ਜਾਂਦੇ , ਗਊਆਂ ਦੇ ਰਾਹ ਉੱਤੇ ,

ਵਿਛੜ ਗਏ
ਉਂਨ੍ਹਾਂ ਹਾਣੀਆਂ ਦੀ ਗੱਲ ਕਰੀਏ ...

ਆਓ
ਬਲਦੀਆਂ ਹਿੱਕਾਂ ਅੰਦਰ ,
ਫਰੋਲ ਸਿਵਿਆਂ ਦੀ ਅੱਗ ਨੂੰ ,
ਘੱਲੂ-ਘਾਰਿਆਂ ਦੀ ਪੀੜ ਵਿੱਚ ...

ਕਿਸੇ
ਭਾਈ ਘਨਈਏ ਦੀ ਗੱਲ ਕਰੀਏ !!

ਕਬਰਾਂ
ਦੇ ਇਸ ਢੇਰ ਚੋ’

ਮਾਤਮ
ਦੀ ਇਸ ਗੋਰ ਚੋ’

ਜ਼ਿੰਦਗੀ
ਦੀ ਕੋਈ ਗੱਲ ਕਰੀਏ !!

ਜ਼ਖਮਾਂ
ਨੂੰ ਪਲੋਸਦੇ ,

ਸੱਚ
ਨੂੰ ਫਰੋਲਦੇ ,

ਅਮਨ
ਨੂੰ ਟੋਲਦੇ , ਅੱਜ

ਮੰਥਨ
ਵਿੱਚ ਜੁੱਟੇ

ਰਾਹੀਆਂ
ਦੀ ਕੋਈ ਗੱਲ ਕਰੀਏ !

ਸਾਂਝਾਂ
ਦੀ ਬਸਾਤ ਦੀ ,

ਸੁਖ
ਸ਼ਾਂਤੀ ਦੀ ਰਾਤ ਦੀ ,

ਸੁਰਖ
ਉਮੀਦਾਂ ਭਰੀ ਪ੍ਰਭਾਤ ਦੀ ...

ਆਓ
ਕੋਈ ਚਾਨਣ ਦੀ ਗੱਲ ਕਰੀਏ ....

ਆਓ
ਤਾਰਿਆਂ ਦੀ ਕੋਈ ਗੱਲ ਕਰੀਏ !

ਸ਼ਬ-ਬਾ-ਖੈਰ ਦੋਸਤੋ !

ਜਸਮੇਰ ਸਿੰਘ ਲਾਲ
06/06/2014

 —